Մրցույթն անցկացվում է երեք փուլով.

•    Քառորդ եզրափակիչ. Թիմերը մասնակցում են քիմիական հարցախաղին, որի ընթացքում՝ սահմանված ժամանակահատվածում, առկա կամ առցանց հարթակում պատասխանում են հարցաշարի հարցերին: Այս փուլի նպատակն է թիմերի վարկանշավորումը։
•    Կիսաեզրափակիչ. Ըստ քառորդ եզրափակիչ փուլում վարկանիշավորման թիմերը մասնակցում են կիսաեզրափակիչ մարտերին համապատասխան խմբերով:
•    Եզրափակիչ. մարտին մասնակցում են կիսաեզրափակիչ փուլերում հաղթած թիմերը:
Եզրափակչի արդյունքում որոշվում է մրցաշարի հաղթողը:

Բոլոր երեք փուլերի բոլոր մասնակիցները ստանում են մասնակցության հավաստագրեր և փոքրիկ հուշանվերներ: Եզրափակիչ փուլի արդյունքում մրցանակային տեղեր զբաղեցրած թիմերն ու նրանց մարզիչներն արժանանում են նաև դիպլոմների և մրցանակների: Մասնակիցներին խրախուսելու համար, կիսաեզրափակիչ փուլի արդյունքների հիման վրա, ժյուրին պատվոգրեր է շնորհում նաև «լավագույն զեկուցող», «լավագույն ընդդիմախոս», «լավագույն գրախոս», յուրաքանչյուր թիմում «լավագույն մասնակից» և անհատական արդյունքներով 1-ին, 2-րդ և 3-րդ տեղերի մրցանակակիր անվանակարգերում։

Մրցույթի շնորհիվ աշակերտները սովորում են հետաքրքիր ձևով ներկայացնել լուծման իրենց տարբերակները և ոչ միայն գրավել ժյուրիի և հանդիսատեսի սրտերը վարժ զեկույցով կամ հմուտ ընդդիմախոսությամբ, այլև այդ ամենը հիմնավորել գիտելիքով: ՊՔՄ-ն իր շուրջ հավաքում է տարբեր մարզերից քիմիայի նվիրյալ ուսուցիչների ու աշակերտների: Մրցաշարի շնորհիվ ստեղծվում են դպրոց-համալսարան, ուսուցիչ-աշակերտ-դասախոս-գիտնական կապեր:

Ահա մի քանի առաջադրանք, որ մեր դպրոցականները փորձում են գիտական մակարդակով լուծել մրցաշարի շրջանակներում:

1.    Մատենադարան։ Բնութագրեք ֆիզիկաքիմիական այն հիմնական գործընթացները, որոնք ընկած են կտավների, գրքերի և ձեռագիր մատյանների «ծերացման» հիմքում: Ինչպե՞ս կարելի է դանդաղեցնել այդ գործընթացը: Նկարագրեք կտավների վերականգնման հիմնական եղանակները և նշեք դրանց թերությունները:
2.    Օրգանիզմը որպես փորձանոթ։ Օրգանիզմը կարելի է դիտարկել որպես կատարյալ փորձանոթ, որտեղ կարգավորված մեխանիզմներով ընթանում են բազմաթիվ և բազմատեսակ ռեակցիաներ: Նկարագրեք որոշ փոխակերպումներ և դրանց խանգարման արդյունքները:
3.     «Անտեսանելի թանաք»։ Առաջարկեք «անտեսանելի թանաքի» և որոշ գործոնների ազդեցությամբ «տեսանելիության» դարձելի փոփոխությամբ օժտված որևէ նյութ կամ նյութերի խառնուրդ: Գնահատեք այդպիսի թանաքի կիրառման հնարավորությունը:

Համագործակից կառույցներ

Մենք շնորհակալություն ենք հայտնում բոլոր կազմակերպություններին՝ այս ծրագրի իրականացմանը աջակցելու համար.

Մրցույթի հովանավոր` «ProfHolod» ՍՊԸ