Homepage E-mail Contacts
«Կենգուրու 2019»-ի խնդիրներն ու դրանց պատասխանները՝ «Խնդիրներ» բաժնում:


«Կենգուրուի» մասին

Խնդիրներ

Երեխաներին+ծնողներին

Դպրոցներին

Հովանավորներին

Հղումներ և
ռեսուրսներ

Ֆորում



«Կենգուրու 2019»-ը հայ աշակերտների համար անցկացվեց արդեն 11-րդ անգամ։

Ուրախությամբ հայտնում ենք, որ մարտի 21-ին Հայաստանում արդեն տասնմեկերորդ, իսկ Արցախում իններոդ անգամ մեծ հաջողությամբ անցկացվեց «Կենգուրու» միջազգային մաթեմատիկական մրցույթը` Հայաստանի բոլոր մարզերի 940 և Արցախի 97 դպրոցների ավելի քան 38 900 աշակերտների մասնակցությամբ:

Շնորհավորում ու շնորհակալություն ենք հայտնում բոլորին այս մեծ իրադարձության հաջող կազմակերպման ու անցկացման համար: Ուրախ ենք և ոգևորված, որ անցյալ տարիներին մասնակցած դպրոցներն ու աշակերտներն այս տարի ևս «Կենգուրուի» հետ էին: Սիրով ողջունում ենք նաև մեզ միացած նոր դպրոցներին ու աշակերտներին:

«Կենգուրու 2019»-ի
խնդիրներն ու ճիշտ պատասխանները
կարող եք գտնել այստեղ:


Բոլոր մասնակից աշակերտների պատասխանների թերթիկներով փաթեթները տարածքային կենտրոններից բերվել են «Այբ»-ի գրասենյակ, որտեղ և մշակվում են FlexiCapture համակարգչային ծրագրով: Ինչպես միշտ, որպես «Այբ»-ի մրցույթների տարածքային կենտրոններ են հանդես եկել մեր մրցույթների կազմակերպչական գործընկեր «ՎՏԲ-Հայաստան բանկ» ՓԲԸ-ի մասնաճյուղերը:

Մրցույթի օրը բոլոր մասնակից աշակերտները որպես հուշանվեր ստացել են գրիչներ և էջանիշ-օրացույցներ, որոնց վրա կան տարբեր խնդիրներ-գլուխկոտրուկներ: Այդ խնդիրների պատասխանները կարող եք գտնել այստեղ:


Մայիսի երկրորդ կեսին յուրաքանչյուր մասնակից դպրոց կստանա ամփոփ հաշվետվություն իր աշակերտների արդյունքների մասին:

Մրցանակաբաշխությունները կանցկացվեն հունիսին Հայաստանի բոլոր մարզերում և Արցախում: Այս անգամ էլ մրցանակաբաշխությունների ընթացքում «Կենգուրու 2019»-ի մրցանակակիրների հետ միասին պարգևատրվելու են նաև «Մեղու 2018» և «Ռուսական արջուկ 2018» մրցույթների մրցանակակիրները: Ինչպես միշտ, բոլոր մասնակից դպրոցներն ու աշակերտները կստանան մասնակցության հավաստագրեր, լավագույն արդյունք ցույց տված երեխաները կարժանանան պատվոգրերի ու խրախուսական մրցանակների, իսկ հաղթողներին սպասում են գլխավոր մրցանակներ:


Ստորև բերում ենք «Կենգուրու 2019»-ի մրցույթի մասնակից դպրոցների ցանկը՝ ըստ մարզերի:



Կրկին շնորհավորում ենք «Կենգուրու 2018»-ի 10 հաղթողներին, բոլոր մասնակից 43 941 աշակերտներին և 1070 դպրոցներին: Մրցույթին մասնակցած 3-12-րդ դասարանների 1646 մրցանակակիր աշակերտներից 846-ը գրանցել են լավագույն արդյունք և արժանացել պատվոգրի: Նշենք, որ մասնակից բոլոր 1070 դպրոցներն ունեցել են առնվազն մեկ մրցանակակիր:

Ահա «Կենգուրու 2018»-ի հաղթողները`

ԱԼԵՆ ԽԵՉՈՅԱՆ
ք. Նոր Հաճն
Նոր Հաճնի թիվ 1 հիմնական դպրոց
3-րդ դասարան

ԱՐԱՄ ԿԱՐԱՊԵՏՅԱՆ
ք. Եղեգնաձոր
Եղեգնաձորի թիվ 1 հիմնական դպրոց
4-րդ դասարան

ԴԱՎԻԹ ԶԱՔԱՐՅԱՆ
ք. Աբովյան
Աբովյանի կրթահամալիր
4-րդ դասարան

ՄԵՐԻ ՄԻՆԱՍՅԱՆ
գ. Այգեզարդ
Այգեզարդի Ա. Ղարիբյանի անվան միջնակարգ դպրոց
4-րդ դասարան

ՆԱՐԵ ՍՄԲԱՏՅԱՆ
ք. Երևան
Երևանի թիվ 197 հիմնական դպրոց
4-րդ դասարան

ՎԱՀԱՆ ԱԲՐԱՀԱՄՅԱՆ
ք. Երևան
Վազգեն Առաջինի անվան թիվ 168 հիմնական դպրոց
4-րդ դասարան

ԼԻԼԻ ԹԱՐԽԱՆՅԱՆ
ք. Երևան
«Այբ» դպրոց
6-րդ դասարան

ԱՐԱՅԻ ԽԱԼԱԹՅԱՆ
ք. Երևան
«Քվանտ» վարժարան
8-րդ դասարան

ԱՐՇԱԿ ԵՍԱՅԱՆ
ք. Երևան
ԵՊՀ-ին առընթեր Ա. Շահինյանի անվան
ֆիզիկամաթեմատիկական հատուկ դպրոց
8-րդ դասարան

ԷՐԻԿ ՄԵԼԻՔՅԱՆ
ք. Վանաձոր
Պ. Տիչինայի անվան թիվ 20 միջնակարգ դպրոց
8-րդ դասարան

Շնորհավորում ենք բոլոր տասը աշակերտներին փայլուն հաղթանակի և բացառիկ ձեռքբերման համար:

2018 թվականը հիշարժան էր ոչ միայն իր արդյունքներով, այլ մեր երկրի գլխավոր պաշտոնյային հյուրընկալվելու գեղեցիկ ավանդույթով և «Կենգուրուի» 10-ամյակը նշելու միջոցառմամբ:

Գիտելիքի օրվան ընդառաջ երկրի գլխավոր պաշտոնյան` Հայաստանի Հանրապետության վարչապետ Նիկոլ Փաշինյանը հյուրընկալեց «Կենգուրու 2018»-ի հաղթողներին, ՀՀ յուրաքանչյուր մարզում և Արցախում, ինչպես նաև յուրաքանչյուր տարիքային խմբում լավագույն արդյունք ցուցաբերած մրցանակակիրներին:

Վարչապետը շնորհավորեց երեխաներին, մաղթեց նորանոր ձեռքբերումներ և հանձնեց իրենց հավաստագրերն ու մեդալները:


2018 թ.-ի հոկտեմբերի 28-ին «Այբ» կրթական հիմնադրամը Երևանի Շառլ Ազնավուրի անվան հրապարակում անցկացրեց բաց միջոցառում՝ նվիրված «Կենգուրու» միջազգային մաթեմատիկական մրցույթի՝ Հայաստանում անցկացման տասնամյակին։

Միջոցառման ընթացքում հյուրերը ներգրավվեցին փոխգործուն խաղերում ու հետաքրքիր հարցախաղերում, մասնակցեցին պարի վարպետության դասերի, վայելեցին պարային և երաժշտական ելույթներ։ Նկարում «Կենգուրուի» բոլոր 10 տարիների հաղթողներն են:


«Կենգուրու 2018»-ի մանրամասն արդյունքները, մրցանակակիր աշակերտների և դպրոցների անունները կգտնեք մեր կայքէջի Հղումներ և ռեսուրսներ բաժնում:


Ուրախալի լուր: Վաճառքում են «Կենգուրուի» ինը խնդրագրքերը, որոնցում ներառված են 2008-2017 թթ. ավելի քան 1400 խնդիրները՝ իրենց լուծումներով: Դրանք կարող են ծառայել որպես օժանդակ նյութ՝ արտադասարանային պարապմունքներ անցկացնելու և «Կենգուրուին» և մաթեմատիկայի այլ մրցույթներին նախապատրաստվելու համար:

«Կենգուրուի» խնդրագրքերը կարելի է ձեռք բերել Երևանի և Հայաստանի այլ քաղաքների գրախանութներից: Ուզում ենք հատուկ նշել, որ բոլոր ութ խնդրագրքերում ներառված տասը տարիների (2008-2017 թթ.) խնդիրներն էլ հավասարապես օգտակար են «Կենգուրու» մրցույթին պատրաստվելու համար:


«Կենգուրուի» կազմակերպմանն ու անցկացմանն առնչվող նյութերը կարող եք տեսնել` այցելելով Հղումներ և ռեսուրսներ բաժին:


Մրցույթի և խնդիրների հետ կապված հարցերն ու առաջարկները գրեք մեր kangaroo@@@ayb.am էլհասցեին (ուղարկելիս @@@-ի փոխարեն գրեք միայն մեկ @). մենք սիրով կպատասխանենք բոլոր հարցերին և կդիտարկենք առաջարկները:


Սպասում ենք ձեզ նաև «Այբ» կրթական հիմնադրամի «Այբ» մրցույթներ Facebook-յան էջում, որտեղ բոլորս կարող ենք ազատ շփվել, հայտնել կարծիքներ, քննարկել նախորդ տարիների խնդիրները, պարզաբանել «Կենգուրու 2019»-ի հետ կապված կազմակերպչական հարցեր:



Սիրով՝ Կենգուրու