Homepage E-mail Contacts
«Կենգուրու 2018»-ի մրցանակաբաշխությունները՝ հունիսի առաջին կեսին:


«Կենգուրուի» մասին

Խնդիրներ

Երեխաներին+ծնողներին

Դպրոցներին

Հովանավորներին

Հղումներ և
ռեսուրսներ

Ֆորում



«Կենգուրու 2018»-ն արդեն 10-րդ անգամ անցկացվեց հայ աշակերտների համար:

Ուրախությամբ հայտնում ենք, որ մարտի 15-ին Հայաստանում արդեն տասներորդ, իսկ Արցախում ութերորդ անգամ մեծ հաջողությամբ անցկացվեց «Կենգուրու» միջազգային մաթեմատիկական մրցույթը` երկրի բոլոր մարզերի 985 և Արցախի 85 դպրոցների և ավելի քան 43 500 աշակերտների մասնակցությամբ:


Շնորհավորում ու շնորհակալություն ենք հայտնում բոլորին այս մեծ իրադարձության հաջող կազմակերպման ու անցկացման համար: Ուրախ ենք և ոգևորված, որ անցյալ տարիներին մասնակցած դպրոցներն ու աշակերտներն այս տարի ևս «Կենգուրուի» հետ էին: Սիրով ողջունում ենք նաև մեզ միացած նոր դպրոցներին ու աշակերտներին:

«Կենգուրու 2018»-ի
խնդիրներն ու ճիշտ պատասխանները
կարող եք գտնել այստեղ:



Բոլոր մասնակից աշակերտների պատասխանների թերթիկներով փաթեթները «ՎՏԲ-Հայաստան բանկ» ՓԲԸ-ի մասնաճյուղերից բերվել են «Այբ»-ի գրասենյակ, որտեղ մշակվելու են FlexiCapture համակարգչային ծրագրով: Մայիսի 15-20-ին յուրաքանչյուր մասնակից դպրոց կստանա ամփոփ հաշվետվություն իր աշակերտների արդյունքների մասին: Իսկ հունիսի առաջին կեսին նախատեսվում են մրցանակաբաշխություններ Հայաստանի բոլոր մարզերում և Արցախում:

Այս անգամ էլ մրցանակաբաշխությունների ընթացքում «Կենգուրու 2018»-ի մրցանակակիրների հետ միասին պարգևատրվելու են նաև «Մեղու 2017» և «Ռուսական արջուկ 2017» մրցույթների մրցանակակիրները: Ինչպես միշտ, բոլոր մասնակից դպրոցներն ու աշակերտները կստանան մասնակցության հավաստագրեր, լավագույն արդյունք ցույց տված երեխաները կարժանանան պատվոգրերի ու խրախուսական մրցանակների, իսկ հաղթողներին սպասում են գլխավոր մրցանակներ:

Ստորև բերում ենք «Կենգուրու 2018» մրցույթի մասնակից դպրոցների ցանկը՝ ըստ մարզերի:


Հիշեցում. Եթե երեխան վճարել է և ինչ-ինչ պատճառներով չի մասնակցել մրցույթին (նրա անունը չկա դպրոցի վերջնական ցանկում և չկա նրա պատասխանների թերթիկը), ապա նրա ծնողը կարող է հետ պահանջել մասնակցության վճարը` դիմում ներկայացնելով «Այբ» կրթական հիմնադրամ մինչև 2018 թ. ապրիլի 16-ը ներառյալ: Գումարները կվերադարձվեն բացառապես երեխայի ծնողին` վերջինիս դիմումի հիման վրա: Նշված ժամկետից հետո գումարներ չեն վերադարձվում: «Կենգուրու 2018» մրցույթի մասնակցության վճարների վերադարձման ընթացակարգը կարող եք գտնել այստեղ (ռուսերեն տարբերակը՝ այստեղ):

Կրկին շնորհավորում ենք «Կենգուրու 2017»-ի հինգ հաղթողներին, բոլոր մասնակից 40 467 երեխաներին և 1024 դպրոցներին: Մեծ ուրախությամբ հայտնում ենք, որ «Կենգուրու 2017»-ն ունի 3-12-րդ դասարանների 1773 մրցանակակիր աշակերտ, որոնցից 1072-ը գրանցել են լավագույն արդյունք և արժանացել պատվոգրի: Նշենք, որ մասնակից 1024 դպրոցներից ոչ մեկը չի մնացել առանց գոնե մեկ մրցանակակրի:

Լիահույս ենք, որ այս տարի ևս բոլոր մասնակիցները նույն խանդավառությամբ կփորձեն ուժերը մաթեմատիկայում: Բոլոր այն դպրոցներին, որոնք նախորդ տարիներին չեն մասնակցել մրցույթին, սիրով հրավիրում ենք միանալու «Կենգուրու» կոչվող մանկական մաթեմատիկական շարժմանը:

«Կենգուրու 2017»-ի մանրամասն արդյունքները, մրցանակակիր աշակերտների և դպրոցների անունները կգտնեք մեր կայքէջի Հղումներ և ռեսուրսներ բաժնում:


Ահա «Կենգուրու 2017»-ի հաղթողները`


ԳԱԳԻԿ ԳԵՎՈՐԳՅԱՆ
ք. Երևան
Ն. Ստեփանյանի անվան թիվ 71 հիմնական դպրոց
4-րդ դասարան

ԷՐԻԿ ՄԵԼԻՔՅԱՆՆ
ք. Վանաձոր
Պ. Տիչինայի անվան թիվ 20 միջնակարգ դպրոց
7-րդ դասարան

ՆԱՐԵԿ ՄԿՐՏՈՒՄՅԱՆ
ք. Երևան
ԵՊՀ-ին առընթեր Ա. Շահինյանի անվան
ֆիզիկամաթեմատիկական հատուկ դպրոց
11-րդ դասարան

ՀԱՅԿ ՀԱՐՈՒԹՅՈՒՆՅԱՆ
ք. Երևան
ԵՊՀ-ին առընթեր Ա. Շահինյանի անվան
ֆիզիկամաթեմատիկական հատուկ դպրոց
12-րդ դասարան

ՄԻՔԱՅԵԼ ՄԿՐՏՉՅԱՆ
ք. Երևան
ԵՊՀ-ին առընթեր Ա. Շահինյանի անվան
ֆիզիկամաթեմատիկական հատուկ դպրոց
12-րդ դասարան


Շնորհավորում ենք բոլոր հինգ աշակերտներին փայլուն հաղթանակի և բացառիկ ձեռքբերման համար:


Ուրախալի լուր: Վաճառքում են «Կենգուրուի» խնդրագրքերը, 2008-2009 թթ., 2010 թ., 2011 թ., 2012 թ., 2013 թ., 2014 թ., 2015 թ. և 2016 թ. ավելի քան 1290 խնդիրները՝ իրենց լուծումներով: Դրանք կարող են ծառայել որպես օժանդակ նյութ՝ արտադասարանային պարապմունքներ անցկացնելու և մաթեմատիկայի օլիմպիադաներին ու «Կենգուրու» մրցույթին նախապատրաստվելու համար:

«Կենգուրուի» խնդրագրքերը կարելի է ձեռք բերել Երևանի և Հայաստանի այլ քաղաքների գրախանութներից: Ուզում ենք հատուկ նշել, որ բոլոր ութ խնդրագրքերում ներառված ինը տարիների (2008-2016 թթ.) խնդիրներն էլ հավասարապես օգտակար են «Կենգուրու» մրցույթին պատրաստվելու համար:


«Կենգուրուի» կազմակերպմանն ու անցկացմանն առնչվող նյութերը կարող եք տեսնել` այցելելով Հղումներ և ռեսուրսներ բաժին:


Մրցույթի և խնդիրների հետ կապված հարցերն ու առաջարկները գրեք մեր kangaroo@@@ayb.am էլհասցեին (ուղարկելիս @@@-ի փոխարեն գրեք միայն մեկ @). մենք սիրով կպատասխանենք բոլոր հարցերին և կդիտարկենք առաջարկները:


Սպասում ենք ձեզ նաև «Այբ» կրթական հիմնադրամի «Այբ» մրցույթներ Facebook-յան էջում, որտեղ բոլորս կարող ենք ազատ շփվել, հայտնել կարծիքներ, քննարկել նախորդ տարիների խնդիրները, պարզաբանել «Կենգուրու 2018»-ի հետ կապված կազմակերպչական հարցեր:



Սիրով՝ Կենգուրու